tuyong dilis muli ang ulam, tuyong dilis pa rin
walang tuyong hawot, tuyong biklad o tuyong daing
buti na lang kahit papaano'y may isasaing
at kahit papaano sa gutom ay pansagip din
paminsan-minsan lang naman ang pagkain ng tuyo
anong talab sa katawan, lagi bang nadudungo
na kahit sa trabaho'y masipag ay laging bigo
buti na lang may kamatis na sa kanin kahalo
tara, saluhan mo ako't nang makapagkwentuhan
anong palagay mo sa nangyayari sa lipunan
tuyo ba ang bayan sa kawalan ng katarungan
na libo-libong pinaslang ay di malilimutan
tuyo nga ang bayang walang panlipunang hustisya
pinapurol sila ng paghanga sa sinasamba
nilang idolong palamura na'y palamara pa
tuyo lang ang pinag-usapan, kayraming paksa na
pagkat di dapat matuyuan ang ating sarili
upang sa mga nangyayari'y maging walang paki
maggulay din, kalusugan ay huwag isantabi
nang tayo'y may lakas, magsama mang muli sa rali
- gregoriovbituinjr.
08.15.2021
Walang komento:
Mag-post ng isang Komento