COMMUNITY PANTRY NG MGA PINOY SA THAILAND
di na lang sa Timor Leste kundi sa Thailand na rin
ang diwa ng community pantry ay nakarating
sadyang ang bayanihan ay damayang anong galing
pati O.F.W. na pamilya'y di kapiling
patunay itong buhay na buhay ang bayanihan
na sa kabila man ng pandemya'y nagtutulungan
nasa Thailand man, magbigay ayon sa kakayahan
at kumuha lang ayon sa iyong pangangailangan
nangibangbayan na kayo upang magsakripisyo
malayo sa pamilya'y doon nakapagtrabaho
sino pa bang magtutulungan kundi kayo-kayo
ang bayanihan nga'y dinala sa lupa ng dayo
tunay na kulturang di lang sa libro mababasa
nagbabayanihan na, nagdo-door-to-door pa sila
salamat, kayo'y sadyang kahanga-hangang talaga
tunay na mga bayani ng bayan at pamilya
- gregoriovbituinjr.
Walang komento:
Mag-post ng isang Komento